BIBLIOTHECA AUGUSTANA

 

Sebastianus Brant

1458 - 1521

 

De fulgetra anni 1492

 

1492

 

Textus:

in: Lateinische Gedichte deutscher Humanisten

ed. H. C. Schnur, Stuttgart 1966, p. 22-25

 

_________________________________________________________

 

 

 

De fulgetra immani iam nuper anno [14]92

prope Basileam in agros Suntgaudiae iaculata

 

Perlegat antiquis miracula facta sub annis

qui volet, et nostros comparet inde dies,

visa licet fuerint portenta horrendaque monstra:

lucere e caelo flamma, corona, trabes,

5

astra diurna, faces, tremor et telluris hiatus

et bolides, Typhon, sanguineusque polus.

circulus et lumen nocturno tempore visum,

ardentes clipei et nubigenesque ferae.

montibus et visi quondam concurrere montes,

10

armorum et crepitus et tuba terribilis.

lac pluere e caelo visum est frugesque calybsque,

ferrum etiam et lateres et caro, lana, cruor.

et sescenta aliis ostenta ascripta libellis,

prodigiis ausim vix similare novis.

15

visio dira quidem Friderici tempore primi

et tremor in terris lunaque solque triplex.

hinc cruce signatus Friderico rege secundo

excidit inscriptus grandinis imbre lapis.

Austria quem genuit senior Fridericus in agros

20

tertius hunc proprios et cadere arva videt.

nempe quadringentos post mille peregerat annos

sol, noviesque decem signifer atque duos,

septem praeterea dat Idus metuenda Novembris,

ad medium cursum tenderat illa dies,

25

cum tonat horrendum crepuitque per aethera fulmen

multisonum: hic ingens concidit atque lapis,

cui species deltae est aciesque triangula: obustus

est color et terrae forma metalligerae.

missus ab obliquo fertur, visusque sub auris

30

Saturni qualem mittere sidus habet.

senserat hunc Enßheim, Suntgaudia sensit; in agros

illic insiluit depopulatus humum,

qui licet in partes fuerit distractus ubique,

pondus adhuc tarnen hoc continet: ecce vides.

35

quin mirum est potuit hiemis cecidisse diebus

aut fieri in tanto frigore congeries?

et nisi Anaxagorae referant monimenta, molarem

casurum lapidem credere et ipse negem.

hic tunc auditus fragor undique litore Rheni,

40

audiit hunc Uri proximus Alpicola,

Norica vallis eum, Suevi Rhaetique stupebant,

Allobroges timeant, Francia mota tremit.

quicquid id est, magnum portendit, crede, futurum

omen: at id veniat hostibus, oro, malis.

 

In schedia eodem anno (MCDXCII) typis expressa

hae lectiones variae inveniuntur:

18: grammate ab imbre.

38: et ista negem.

42: Francia certe tremit.