B  I  B  L  I  O  T  H  E  C  A    A  U  G  U  S  T  A  N  A
           
  Conradus Celtis
1459 - 1508
     
   



E p i g r a m m a t a

Textus:
Lateinische Gedichte
deutscher Humanisten
ed. Harry C. Schnur
Stuttgart 1966


_______________________________________________


Ad Romam, dum illam intraret.

Quid superest, o Roma, tuae nisi fama ruinae
      de tot consulibus Caesaribusque simul?
Tempus edax sic cuncta vorat nilque exstat in orbe
      perpetuum, Virtus scriptaque sola manent.


De puella Romae reperta.

Annos mille sub hoc tumulo conclusa iacebam;
      haec nunc Romanis extumulata loquar:
Non veteres video Romano more Quirites,
      iustitia insignes nec pietate viros.
5
Sed tantum magnas tristi cum mente ruinas
      conspicio, veterum iam monumenta virum.
Si mihi post centum rursus revideberis annos,
      nomen Romanum vix superesse reor.